Dimècres 7 de julhet, 21oras, au Teatre dau Périscope, a Nimes, serà donat dins lo quadre l’Universitat Occitana d’Estiu, la premiera de l’espectacle dau Centre Dramatic Occitan, « Occitània for ever », qu’es un viatge dins l’òbra teatrala de Robèrt Lafont. Mes en scéna per Andrieu Neyton, aquel espectacle es un omenatge à Robèrt Lafont dramaturg que liguèt tota sa cracion teatrala a son engatjament occitan. Sota lo biais d’una mosaïca que recampa seis òbras mai importantas dins de formas artisticas divèrsas, « Occitània for ever » es un viatge despuei l’aventura patetica dau trobador Pèire Vidal dins « La Loba » fins a l’imaginari delirant d’un « Dòm Esquichòte » revenjaire d’una provença acairada per d’enemics que son pas de molins de vent ! Dins aquela passejada retrobarem « Lei Cascavèus », « La Crosada » e « Per jòia recomençar », pèça que marca la començança d’un teatre occitan bilingüe de lucha. L’espectacle es bastit sus un chausida de scènas de cada òbra e de comentaris o de nòtas l’autor sus son oportunitat en coeréncia ambé on combat per Occitània. L’espectacle dura aperaqui une ora e mieja ; virarà après aquesta representacion e serà presentat a l’Estivada de Rodés lo 30 de julhet.

Mesclum – La Marseillaise